Se celle que jadiz servoye
De si bon cueur et loyaulment,
Dont tant de maulx et griefz j'avoye
Et souffroye tant de tourment,
Se dit m'eust au commencement,
Sa voulenté, mais nennil, las !
J'eusse mis paine aucunement
De moy retraire de ses las.

LXVI

Quoy que je lui voulsisse dire,
Elle estoit preste d'escouter
Sans m'acorder ne contredire.
Qui plus, me souffroit acouter
Joignant d'elle, près sacouter ...
Et ainsi m'aloit amusant
Et me souffroit tout raconter,
Mais ce n'estoit qu'en m'abusant.

LXVII

Abusé m'a et fait entendre
Tousjours d'un que ce feust ung aultre :
De farine que ce feut cendre,
D'un mortier ung chappel de faultre,
De viel machefer que feust peaultre,
D'ambesars que c'estoïent ternes
- Tousjours trompeur autruy engautre
Et rent vecyes pour lanternes -,

LXVIII

Du ciel, une paille d'arrain,
Des nues une peau de veau,
Du main que c'estoit le serain,
D'ung troignon de chou, ung naviau,
D'ordre servoyse vin nouveau,
D'une truye ung molin a vent
Et d'une hart ung escheveau,
D'ung graz abé ung poursuivant.

LXIX

Ainsi m'ont Amours abusé
Et pourmené de l'uys au pesle.
Je croy qu'omme n'est si rusé,
Fust fin com argent de coupelle,
Qui n'y laissat linge, drappelle,
Mais qu'il fut ainsi manïé
Comme moy, qui partout m'appelle
L'amant remys et regnÿé.

LXX

Je regnye Amours et despite
Et deffie a feu et a sang.
Mort par elles me precepicte,
Et ne leur en chault pas d'un blanc.
Ma vïelle ay mis soubz le banc,
Amans je ne suiveray ja maiz ;
Se jadiz je fuz de leur renc,
Je declaire que n'en suis maiz ;

LXXI

Car j'ay mis le plumail au vent :
Or les suive qui a actente !
De ce me taiz doresnavent,
Car poursuivre je vueil mon entente.
Et s'aucun m'interrogue ou tente
Comment d'Amours j'ose mesdire,
Ceste parolle le contente :
« Qui meurt a ses loix de tout dire » .

LXXII

Je congnois approucher ma seuf,
Je crache blanc comme coton
Jacoppins groz comme ung esteuf.
Qu'esse a dire ? que Jehanneton
Plus ne me tient pour valleton,
Mais pour ung viel usé rocquart :
De viel porte voix et le ton,
Et ne suis q'un jeune cocquart.

LXIII

Dieu mercy ... et Tacque Thibault,
Qui tant d'eaue froide m'a fait boire,
En ung bas, non pas en ung hault,
Menger d'angoisse mainte poire,
Enferré ... Quant j'en ay memoire,
Je prie pour luy, et relicqua ,
Que Dieu luy doint, et voire voire,
Ce qui je pense, et cetera.

LXXIV

Toutesfoiz, je n'y pense mal
Pour lui, et pour son lieutenant,
Aussi pour son officïal
Qui est paisant et advenant,
Que faire n'ay du remenant
Mais du petit maistre Robert :
Je les ayme tout d'un tenant,
Ainsi que fait Dieu le Lombart.

LXXV

Sy me souvient bien, Dieu mercis,
Que je feiz a mon partement
Certains laiz, l'an cinquante six,
Qu'aucuns, sans mon consentement,
Voulurent nommer testament ;
Leur plaisir fut, non pas le myen.
Mais quoy ! on dit communement
Q'ung chacun n'est maistre du sien.

LXXVI

Pour les revocquer ne le diz,
Et y courrust toute ma terre.
De pictié ne suis reffroydiz
Envers le bastart de la Barre :
Parmy ses troys gluyons de feurre
Je lui donne mes vieilles nattes ;
Bonnes seront pour tenir serre
Et soy soustenir sur les pates.

LXXVII

S'ainsi estoit qu'aucun n'eust pas
Receu le laiz que je lui mande,
J'ordonne qu'aprés mon trespas
A mes hoirs en face demande.
Mais qui sont ilz ? Si le demande
Morreau, Prouvins, Robin Turgis :
De moy, dictes que je leur mande,
Ont eu jusqu'au lit ou je gis.

LXVIII

Somme, plus ne diray qu'un mot,
Car commencer vueil a tester.
Devant mon clerc Fremin qui m'ot,
S'il ne dort, je vueil protester
Que n'entens homme detester
En ceste presente ordonnance,
Et ne la vueil manifester ...
Synon ou royaume de France.

LXXIX

Je sens mon cueur qui s'affoiblist
Et plus je ne puis papïer.
Fremin, siez toy pres de mon lit,
Que l'en m'y viengne espïer.
Pren ancre tost, plume et pappier,
Ce que nomme escriptz vistement,
Puis fay le partout coppïer.
Et vecy le commencement.

LXXX

Ou nom de Dieu, Pere eternel,
Et du Filz que vierge parit,
Dieu au Pere coeternel
Ensemble et le Saint Esperit,
Qui sauva ce qu'Adam perit
Et du pery parre les cyeulx ...
Qui bien ce croit peu ne merit,
Gens mors estre faiz petiz dieux.

LXXXI

Mors estoïent et corps et ames,
En dampnee perdicïon,
Corps pourriz et ames en flasmes,
De quelconcque condicïon.
Toutesffoiz fais excepcïon
Des patriarches et prophectes,
Car, selon ma concepcïon,
Oncques grant chault n'eurent aux fesses.

LXXXII

Qui me diroit : « Qui vous fait mectre
Si tres avant ceste parolle,
Qui n'estes en theologie maistre ?
A vous est presumpcïon folle »,
C'est de Jhesus la parabolle
Touchant du riche ensevely
En feu, non pas en couche molle,
Et du ladre de dessus ly.

LXXXIII

Se du ladre eust veu le doyt ardre;
Ja n'en eust requis reffrigere
N'au bout d'icelluy doiz aerdre
Pour raffreschir sa machoüoire.
Pÿons y feront macte chierre,
Qui boyvent pourpoint et chemise !
Puis que boiture y est si chiere.
Dieux nous garde de la main mise !

LXXXIV

Ou nom de Dieu, comme j'ay dit,
Et de sa glorïeuse Mere,
Sans pechié soit parfait ce dit
Par moy, plus maigre que chimere;
Se je n'ay eu fievre enfumere,
Ce m'a fait divine clemence ;
Mais d'autre dueil et perte amere
Je me tais, et ainsi commence.

LXXXV

Premier doue de ma povre ame
La glorïeuse Trinité,
Et la commande a Nostre Dame,
Chambre de la divinité,
Priant toute la charité
Des dignes neuf ordres des cieulx
Que par eulx soit ce dont porté
Devant le trosne precïeulx.

LXXXVI

Item, mon corps j'ordonne et laisse
A nostre grant mere la terre ;
Les vers n'y trouveront grant gresse,
Trop lui a fait fain dure guerre.
Or luy soit delivré grant erre,
De terre vint, en terre tourne !
Toute chose, se par trop n'erre,
Voulentiers en son lieu retourne.

LXXXVII

Item, et a mon plus que pere,
Maistre Guillaume de Villon,
Qui esté m'a plus doulx que mere,
Enffant eslevé de maillon
- Degecté m'a de maint boullon
Et de cestuy pas ne s'esjoye ;
Sy lui requier a genoullon
Qu'il m'en laisse toute la joye -,

LXXXVIII

Je luy donne ma librairye
Et le roumant du Pet au Deable,
Lequel maistre Guy Tabarye
Grossa, qui est homs veritable.
Par cayeulx est soubz une table ;
Combien qu'il soit rudement fait,
La matiere est si tres notable
Qu'elle admende tout le meffait.

LXXXIX

Item, donne a ma povre mere,
Pour saluer nostre Maistresse,
Qui pour moy ot douleur amere,
Dieu le scet, et mainte tristesse
- Autre chastel n'ay ne forteresse
Ou me retraye corps ne ame
Quant sur moy court malle destresse,
Ne ma mere, la povre femme -.