Item, vueil que le jeune Marle
Desormaiz gouverne mon change,
Car de changer enviz me mesle,
Pourveu que tousjours baille en change,
Soit a privé soit a estrange,
Pour troys escus six brectes targes,
Pour deux angelotz ung grant ange,
Car amans doivent estre larges.

CXXVII

Item, j'ay sceu en ce voyaige
Que mes troys povres orphelins
Sont creuz et deviennent en aage
Et n'ont pas tetes de belins,
Et qu'enffants d'icy a Salins
N'a mieulx saichant leur tour d'escolle.
Or, par l'ordre des Mathelins,
Telle jeunesse n'est pas folle.

CXXVIII

Sy vueil qu'ilz voisent a l'estude ;
Ou ? sur maistre Pierre Richier.
Le Donat est pour eulx trop rude,
Ja ne les y vueil empescher ;
Ilz sauront, je l'ayme plus cher,
Ave salus, tiby decus,
Sans plus grans lettres enserichier :
Tousjours n'ont pas clercs l'au dessus.

CXXIX

Cecy estudiënt, et ho !
Plus proceder je leur deffens.
Quant d'entendre la grant Credo,
Trop forte elle est pour telz enffans.
Mon grand tabart en long je fens,
Sy vueil que la moictié s'en vende
Pour eulx en acheter des flans,
Car jeunesse est ung peu friande.

CXXX

Sy vueil qu'ilz soient informez
En meurs, quoy que couste basture.
Chapperons aront enformez
Et les poulces sur la sainture,
Humbles a toute creature,
Disans: « Han ? Quoy ? Il n'en est rien ! »
Si diront gens, par adventure :
« Vecy enffants de lieu de bien ! »

CXXXI

Item, a mes povres clergons,
Ausquelz mes tiltres resigné
- Beaulx enfans et droiz comme joncs
Les voyant m'en dessaisiné -,
Sans recevoir leur assigné,
Seur comme qui l'aroit en paulme,
A ung certain jour consigné,
Sur l'ostel de Gueuldry Guillaume.

CXXXII

Quoy que jeunes et esbatans
Soiënt, en riens ne me desplaist :
Dedens trente ans ou quarante ans
Bien autres seront, se Dieu plaist !
Il fait mal qui ne leur complest ;
Ilz sont tres beaulx enfans et gens,
Et qui les bat ne fïert fol est,
Car enffans si deviennent gens.

CXXXIII

Les bources des Dix et Huit Clers
Aront, je m'y vueil traveillier ;
Pas ilz ne dorment comme loirs,
Qui troys moys sont sans resveillier.
Auffort, triste est le sommeillier,
Qui fait aise jeune en jeunesse,
Tant qu'en fin lui faille veillier
Quant reposer deust en viellesse.

CXXXIV

Sy en rescriptz au collateur
Lettres semblables et parreilles ;
Or prient pour leur bien faicteur
Ou qu'on leur tire les orreilles !
Aucunes gens ont grans merveilles
Que tant m'encline vers ces deulx,
Mais, foy que doy festes et veilles,
Oncques ne vy les meres d'eulx.

CXXXV

Item, donne a Michault Cul d'Ou
Et a sire Charlot Tarrenne
Cent solz - s'ilz demandent : « Prins ou ? »
Ne leur chaille, ilz vendront de manne -
Et une houlse de basenne,
Autant empeigne que semelle,
Pourveu qu'ilz me salueront Jehanne,
Et autant une autre comme elle.

CXXXVI

Item, au seigneur de Grigny,
Auquel jadiz lessay Vissextre,
Je donne la tour de Billy,
Pourveu, se huys y a ne fenestre
Qui soit ne debout ne en estre,
Qu'il mecte tres bien tout a point ;
Face argent a destre et senestre,
Il m'en fault et il n'en a point.

CXXXVII

Item, a Thibault de la Garde ..
Thibault ? je mens ; il a nom Jehan,
Que luy donrai ge que ne perde ?
- Assez j'ay perdu tout cest an,
Dieu y vueille pourvoir, amen ! -
Le Barillet  ? Par m'ame, voire,
Genevoys est plus ancïen
Et plus beau nez a pour y boire.

CXXXVIII

Item, je donne a Basennier,
Noctaire et greffïer criminel,
De giroffle plain ung pannier
Prins sur maistre Jehan de Rüeil,
Tant a Mautaint, tant a Rosnel,
Et, avec ce dont de girofle,
Servir de cueur gent et ysnel
Le seigneur qui sert saint Christofle,

CXXXIX

Auquel ceste ballade donne
Pour sa dame, qui tous bien a.
S'Amour ainsi tous ne guerdonne,
Je ne m'esbays de cela,
Car au pas conquester l'ala
Que tint Regnier, roi de Cecille,
Ou si bien fist et peu parla
C'onques Hector fist ne Troïlle.