ENVOI
Prince, aux dames Parisiennes
De beau parler donne le pris;
Quoy qu'on die d'Italiennes,
Il n'est bon bec que de Paris.
CXLV
Regarde m'en deux, troys assises
Sur le bas du ply de leurs robes
En ces moustiers, en ces eglises ;
Tire t'en près et ne te hobes ;
Tu trouveras la que Macrobes
Oncques ne fist telz jugemens.
Entens, quelque chose en desrobes :
Ce sont tous beaulx enseignemens.
CXLVI
Item, et au mont de Montmartre,
Qui est ung lieu moult ancïen,
Je lui donne et adjoincts le tertre
Qu'on dit de mont Valerïen,
Et oultre plus un quartier d'an
Du pardon qu'apportay de Romme ;
Sy yra maint bon chrestïen
En l'abbaye ou il n'entre homme.
CXLVII
Item, varletz et chamberieres
De bons hostelz - riens ne me unyt ! -
Feront tartes, flans et goyeres
Et grans ralïatz a mye nuyt
- Riens n'y font sept pintes ne huit
Tant que gisent seigneur et dame -,
Puis aprés, sans mener grant bruyt,
Je leur ramentoy le jeu d'asne.
CXLVIII
Item, et a filles de bien,
Qui ont peres, meres et antes,
Par m'ame, je ne donne rien,
Car j'ay tout donné aux servantes.
Sy feussent ilz de peu contentes ...
Grant bien leur feissent mains loppins,
Aux povres filles, ennementes,
Qui se perdent aux Jacoppins,
CXLIX
Aux Celestins et aux Chartreux ;
Quoy que vie mainent estroicte,
Sy ont ilz largement entre eulx
Dont povres filles ont souffrecte;
Tesmoing Jacqueline, et Perrecte,
Et Ysabeau qui dit : « Enné ! ».
Puis qu'ilz en ont telle disecte,
A peine en seroit on dampné.
CL
Item, a la Grosse Margot,
Tres doulce face et pourtraicture,
- Foy que doy, brulare bigot,
A si devocte creature,
Je l'ayme de propre nature,
Et elle moy, la doulce sade -,
Qui la trouvera d'aventure,
Qu'on lui lise ceste ballade.